– ‘Vazhdon kërkimi në Shqipëri për “mercenarin portugez”’- kështu nis artikullin media portugeze për Ruben Saraivën, autorin e vrasjes së Ardian Nikulajt në Shëngjin. Më tej, për autorin thuhet se kishte emigruar në Britani e mesa duket u përfshi me mafian shqiptare atje. Më pas, theksohet se pas vrasjes së biznesmenit shqiptar, Saraiva dhe grupi i tij u larguan nga Shqipëria, duke kaluar fillimisht nga Maqedonia e Veriut e më pas u kthyen në Britaninë e Madhe.
“Rúben Saraiva thuhet se “kërkohet nga policia në të gjithë botën”. Një gjueti njerëzore është duke u zhvilluar në Shqipëri për një shtetas portugez të përshkruar nga tabloidi Correio da Manhã si “një mercenar”. Rúben Saraiva është në fakt një nga pesë individët që kërkohen në lidhje me vrasjen në fillim të këtij muaji të një biznesmeni me aspirata politike që besohet të ketë pasur lidhje me mafian shqiptare.
Këtu lajmet përqendrohen vetëm te Saraiva, një i ri që mësohet se ka emigruar në Britani dhe me sa duket është përfshirë më pas me mafien shqiptare atje. Saraiva besohet të ketë qenë ‘autori’.
Gjatë kësaj periudhe “ai provoi të paktën dy përpjekje për të eliminuar objektivin pa e realizuar objektivin e tij”, thotë gazeta. Saraiva dhe bashkëpunëtorët e tij të dyshuar më pas besohet se janë larguar nga Shqipëria – mbi kufirin tokësor me Maqedoninë e Veriut – dhe janë kthyer në Britani të Madhe”- shkuhet në artikull.
Autori portugez, Ruben Saraiva, kishte mbi 2 muaj që jetonte në fshatin Kakarriq në Shkodër. Atje mësohet se jetonte te shtëpia e Edmond Haxhisë, e herë pas here lëvizte edhe në Shkodër. Më pas ai nisi të mësonte gjuhën shqipe dhe përshëndeste në shqip. Lëvizte me veturë dhe motor, pikërisht me motorin që përdori për të kryer krimin. Ai motor është përdorur herë pas here nga 27-vjeçari për të kryer lëvizjet e tij.
Vrasja e Nikulajt u zbardh tre ditë më parë. Policia e Shtetit doli me një deklaratë zyrtare ku njoftoi se gjithçka ishte planifikuar nga vëllezërit Lestakaj, me të cilët Nikulaj ishte në hasmëri që prej vitit 1997. Dyshohet se Lestakajt kishin paguar një skuadër të huajsh për të ardhur për të kryer vrasjen. Sipas të dhënave të PSH-së, në rolin e ekzekutorit ishte portugezi Ruben Saraiva, ndërsa katër britanikë ishin vëzhgues. Ata janë identifikuar si: Harry Simson, Thomas Mithan, Steven Hunt dhe Harriet Bridgeman. I gjithë ekipi menaxhohej nga Edmond Haxhia, djali i dajës i vëllezërve Lestakaj. Por, deri më tani asnjë prej të përfshirëve nuk janë arrestuar. Të gjithë janë larguar nga Shqipëria dhe nuk dihet destinacioni i tyre. Nga ana tjetër, vetë vëllezërit Lestakaj ndodhen në Britaninë e Madhe.
