Një ekspozim i rrallë i shërbimit sekret estonez të mirë informuar EFSI është nxjerrë në dritë nga gazeta “Die Welt”. Ka të bëjë me qëllimet strategjike të Rusisë për luftë agresive, bashkëpunimin e Moskës me Pekinin dhe kërcënimin bërthamor. Sipas redaktorëve, “Qëllimi i Moskës është kapitullimi ushtarak dhe politik i Ukrainës. Rusia e Putinit nis nga supozimi se qëndrueshmëria e rezistencës së Kievit dhe mbështetja e Perëndimit ndoshta do të shembet më shpejt se elasticiteti i vetë Rusisë.
Qëllimi është shpërbërja e unitetit perëndimor
Një pikë tjetër e rëndësishme është informacioni i inteligjencës se Rusia nuk është e gatshme të kthejë territoret e pushtuara. “Supozohet se një Ukrainë e rraskapitur do të ulet në tryezën e bisedimeve. Dhe gjatë negociatave, Rusia pret të jetë në gjendje të vendosë kushtet e saj dhe të dalë fitimtare”. Por cili është qëllimi strategjik i Rusisë? Sipas raportit “edhe pas një disfate të mundshme të Ukrainës mbetet e njëjtë dhe e pandryshuar: Nënshtrimi i Ukrainës, erozioni i unitetit të Perëndimit dhe transformimi i sigurisë evropiane…. Rusia po i zhvendos burimet e saj diplomatike nga Perëndimi në rajone të tjera të botës. Objektivi kryesor kundër Perëndimit është të shkatërrojë unitetin e tij, duke përfshirë solidaritetin në miratimin e sanksioneve.
Për sa i përket përdorimit të armëve bërthamore, autorët e raportit e konsiderojnë të pamundur “për shkak të kundërshtimit ndërkombëtar nga njëra anë dhe efektivitetit të tyre të ulët nga ana tjetër… por Rusia e mban kartën bërthamore në tryezë për të frikësuar Perëndimin dhe të pengojë vendet perëndimore të ndihmojnë Ukrainën”.
Lidhur me përfundimin e bashkëpunimit ruso-kinez “Kina po punon intensivisht për të ndërtuar një koalicion të njerëzve me mendje të njëjtë dhe Rusia po luan një rol të rëndësishëm në përpjekjet kineze për të arritur këtë qëllim. Kjo nuk duhet të nënvlerësohet nga të gjithë ata që duan të shohin shenja të përkeqësimit të marrëdhënieve mes dy vendeve”.
