Tirana është rikthyer te fitorja në kampionat, duke mundur 2-1 Egnatian në Rrogozhinë. Tri pikë me shumë vlerë për bardheblutë, teksa shkëputen në krye ndaj rivalëve që e ndjekin.
Kampionët lënë pas menjëherë humbjen në Kukës dhe vazhdojnë pretendimet për të mbrojtur titullin. Sfida ndaj Egnatias nisi shumë mirë për të besuarit e Orges Shehit, teksa shënuan që në sekondën e 50-të. Pas një krosimi në zonë, Përgjoni lëshon një gjuajtje fluturimthi me të majtën dhe ndëshkon portierin Sherri.
Megjithatë, avantazhi nuk zgjat shumë, teksa rrogozhinasit barazojnë në minutën e 10-të. Fangaj hedh një krosim në zonë dhe Duamena me një gjuajtje me të djathtën dërgon topin në rrjetë. Pjesa e parë mbyllet në barazim 1-1.
Në të dytën janë miqtë që instistojnë. Në të 64-n, pas një prekje të topit me dorë në zonën rrogozhinase, ka penallti për Tiranën. Nga pika e bardhë Florent Hasani gjuan saktë dhe 1-2. Fundi është dramatik për miqtë, portieri Bekaj lë fushën e dëmtuar, duke lënë ekipin me 10 vetë si pasojë e kryerjeve të zëvendësimeve.
Në portë futet Përgjoni, i cili bën heroi me një pritje fantastike. Pas më shumë se 10 minutave shtesë, Tirana mbron avantazhin dhe del me tri pikë me vlerë. Pa vërshëllimës finale ka tension në fushë, por shmangen përplasjet fizike.
