Drejtori i Policisë së Vlorës, Elidon Çela, në një konferencë për shtyp këtë të premte ku ka treguar dinamikën e ngjarjes së rëndë të ndodhur në Sarandë, ku mbeti i vrarë 66-vjeçari Rexhep Ismaili dhe u plagos në këmbë 31-vjeçari Kostandin Vogli.
Sipas tij, ngjarja ka ndodhur rreth orës 21:30 të datës 07.05.2026, në fshatin Gjashtë, në ambientet e lokalit në pronësi të Rexhep Ismailit.
“Fillimisht, në vendngjarje kanë shkuar Lulzim Tabaku, Idriz Çela, Eljo Muço, Kostandin Vogli, Marjo Agalliu dhe Ermal Shkalla, të cilët janë afruar te tavolina ku ndodheshin viktima Rexhep Ismaili, së bashku me Tori Ruçin dhe persona të tjerë, dhe menjëherë ka nisur një konflikt i dhunshëm me sende të forta.
Gjatë konfliktit, viktima Rexhep Ismaili ka marrë një armë zjarri automatike dhe ka qëlluar në drejtim të personave të përfshirë në sherr.
Më pas, Lulzim Tabaku ka qëlluar me armë zjarri pistoletë në drejtim të Rexhep Ismailit, i cili ka humbur jetën në vendngjarje. Gjatë shkëmbimit të zjarrit është plagosur në këmbë edhe Kostandin Vogli.
Pas ngjarjes, të gjithë personat e përfshirë janë larguar nga vendi i ngjarjes. Hetimet tregojnë se Hajredin Ismaili, vëllai i viktimës, ka marrë armën automatike dhe një krehër me 21 fishekë dhe i ka fshehur, por më pas ato janë gjetur dhe sekuestruar nga policia.
Policia ka sekuestruar gjithashtu një automjet tip “Audi Q8”, fishekë dhe gëzhoja të kalibrave të ndryshëm, si dhe prova të tjera materiale që po shërbejnë për hetimin.
Gjatë kontrolleve, në fshatin Nivicë është gjetur i braktisur një motomjet që dyshohet se është përdorur nga autorët, ndërsa në lagjen nr. 1 të Sarandës është sekuestruar edhe një automjet tjetër tip “Audi” i përdorur në ngjarje.
Në përfundim të veprimeve të para hetimore, Policia e Shtetit ka shpallur në kërkim Lulzim Tabakun, për vrasje me dashje dhe armëmbajtje pa leje, si dhe Idriz Çelën, Eljo Muçon, Kostandin Voglin, Marjo Agalliun dhe Ermal Shkallën, për veprat penale kanosje dhe shkatërrim prone. Gjithashtu është proceduar penalisht edhe Hajredin Ismaili.
Htimet vijojnë intensivisht për zbardhjen e plotë të rrethanave të ngjarjes dhe për kapjen e personave të shpallur në kërkim”, tha Çela.
Deklarata e plotë e drejtorit të Policisë:
Jam sot këtu për të informuar opinionin publik lidhur me veprimet e shpejta, intensive dhe profesionale hetimore, të kryera nga specialistët e Seksionit për Hetimin e Krimeve ndaj Personit dhe Specialistët për Hetimin e Krimit në Komisariatin e Policisë Sarandë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, me qëllim zbardhjen e autorësisë dhe rrethanave të ngjarjes së ndodhur rreth orës 21:30 të datës 07.05.2026.
Ngjarja ka ndodhur në kryqëzimin e fshatit Gjashtë, në ambientet e lokalit në pronësi të shtetasit R. I., (Rexhep Ismaili) ku mbeti i vrarë me armë zjarri shtetasi R. I., 66 vjeç, si dhe u plagos shtetasi K.V. (Kostandin Vogli).
Si rezultat i veprimeve hetimore, u bë i mundur identifikimi i autorit të dyshuar të vrasjes si dhe zbardhja e dinamikës së ngjarjes.
Gjithashtu, vetëm pak momente më parë është bërë dhe shoqërimi i shtetasit të plagosur Kostandin Vogli i cili aktualisht po merr ndihmën mjekësore dhe ndodhet jashtë rrezikut për jetën. Në vijim ky shtetas do t’u nënshtrohet procedurave penale.
Nga hetimet rezultoi se mbrëmjen e djeshme, shtetasit:
L.T., Lulzim Tabaku, 37 vjeç
I.C., Idriz Çela 40 vjeç,
E.M., Eljo Muço 19 vjeç
K.V., Kostandin Vogli 31 vjeç
M.A Marjo Agalliu 22 vjeç
dhe E.Sh.Ermal Shkalla 21 vjeç
kanë shkuar në lokalin e viktimës dhe janë drejtuar te tavolina ku ndodheshin shtetasi Tori Ruçi i shoqëruar nga viktima dhe persona të tjerë të pranishëm duke filluar menjëherë konfliktin me sende të forta me këta shtetas.
Gjatë konfliktit të dhunshëm, rezulton se viktima R. I ka marrë një armë zjarri automatike dhe ka qëlluar në drejtim të shtetasve të përfshirë në konflikt,
Në vijim të ngjarjes, dyshohet se shtetasi L. T. ka qëlluar me armë zjarri pistoletë në drejtim të shtetasit R. I., i cili për pasojë ka humbur jetën në vendngjarje.
Gjithashtu gjatë shkëmbit të zjarrit ka mbetur i plagosur në këmbë edhe shtetasi K.V.
Pas ngjarjes, të gjithë shtetasit e përfshirë në konflikt janë larguar nga vendi i ngjarjes. Ndërkohë, dyshohet se vëllai i viktimës, shtetasi H. I., ka larguar nga vendngjarja dhe fshehur armën e zjarrit automatike së bashku me një krehër me 21 fishekë, të cilat më pas u gjetën dhe u sekuestruan nga Policia, në cilësinë e provës materiale.
Gjithashtu, u sekuestruan prova të tjera materiale, konkretisht një automjet tip “Audi Q8”, dhe fishekë dhe gëzhoja të kalibrave të ndryshëm dhe sende të tjera që do t’i shërbejnë vijimit të hetimeve.
Gjatë kontrolleve të mëtejshme, në fshatin Nivicë u gjet i braktisur motomjeti, me të cilin dyshohet se është larguar nga vendngjarja autori i dyshuar, shtetasi L. T. Po ashtu, në lagjen nr. 1, Sarandë, u gjet dhe u bllokua një automjet tip “Audi”, i cili dyshohet se është përdorur nga autorët e përfshirë në ngjarje.
Në përfundim të veprimeve të para hetimore, u shpallën në kërkim shtetasit:
L. T., 37 vjeç, për veprat penale “Vrasja me dashje” dhe “Armëmbajtja pa leje”;
I. C., 40 vjeç, E. M., 19 vjeç, K. V., 31 vjeç, M. A., 22 vjeç dhe E. Sh., 21 vjeç, për veprat penale “Kanosja” dhe “Shkatërrimi i pronës”.
Si dhe u proceduar penalisht shtetasi H. I. (Hajredin Ismaili) 60 vjeç, vëllai i viktimës.
Vijojnë hetimet intensive për zbardhjen e plotë të dinamikës së ngjarjes si dhe kërkimet intensive për lokalizimin dhe kapjen e të gjithë shtetasve të shpallur në kërkim.
Në këtë kuadër, ftojmë qytetarët të bashkëpunojnë me Policinë e Shtetit, duke dhënë çdo informacion të vlefshëm për kapjen e shtetasve të shpallur në kërkim dhe për parandalimin e veprimeve të paligjshme.
Policia e Qarkut Vlorë mbetet maksimalisht e angazhuar në luftën kundër kriminalitetit dhe në garantimin e rendit dhe sigurisë për qytetarët, turistët dhe vizitorët.
