Vendi ku qepa kushton më shtrenjtë se mishi.
Rreth 13 dollarë për një kg qepë. Ky është çmimi stratosferik i këtij produkti në Filipine kohët e fundit.
Qepa kushton aktualisht më shumë se mishi në vendin aziatik dhe është kthyer në luks për shumë konsumatorë.
Rizalda Maunes, pronarja e një picerie në qytetin Cebu, thotë për BBC se më parë blinte 3-4 kg qepë në ditë, sot blen vetëm gjysmë kg.
“Edhe klientët tanë na mirëkuptojnë kur nuk i hedhim shumë qepë picave. E dinë situatën, pasi edhe në shtëpitë e tyre e kanë ulur shumë përdorimin e qepës nëpër gatime”, shprehet Maunes.
Çmimi i lartë i qepës ka ndikuar edhe në rritjen e çmimeve të ushqimeve të rrugës, që në Filipine janë shumë të kërkuara nga vendasit dhe turistët. Perimet e skuqura, mishi dhe frutat e detit shërbehen me qepë dhe uthull.
“Qepët janë baza e pjatave tona. Ato i japin shije dhe ëmbëlsojnë ushqimet tona të kripura. Na vjen mirë që qeveria po merr masa për të ndalur rritjen e çmimeve”, thotë Alex Chua.
Presidenti Ferdinand Marcos Jr., i cili është edhe ministër i Bujqësisë, e ka cilësuar rritjen e çmimeve “emergjencë kombëtare”.
