Një person është arrestuar, një tjetër është shpallur në kërkim dhe shtatë të tjerë janë proceduar penalisht nga Policia e Shtetit, pasi dyshohet se janë përfshirë në një skemë kriminale për kontrabandimin e floririt dhe sendeve të tjera me vlerë nga Italia dhe Greqia.
27 vjeçari i arrestuar me iniciale D. S dhe i shpalluri në kërkim B. A., 45 vjeç, dyshohet se siguronin sende me vlerë në Itali dhe Greqi, i fusnin kontrabandë në Shqipëri dhe i tregtonin në argjendari në Fier dhe Lushnjë. Shtatë të proceduarit, janë pronarët e argjendarive.
Shërbimet e Policisë së Fierit kanë sekuestruar 15 kg e 259 gramë ar, 4 kg e 281 gramë argjend, 612 ora të markave të ndryshme, 13 varëse me gurë diamanti, sende të dyshuara me vlerë artistike e kulturore, para në lekë dhe euro, aparate celularë, DVR dhe sende të tjera.
Vlera paraprake e sendeve të sekuestruara llogaritet rreth 2 milionë euro.
