Zëvendëspresidenti i Shteteve të Bashkuara të Amerikës, JD Vance, premtoi të premten se do të studiojë me kujdes informacionin që u është në dispozicion autoriteteve mbi UFO-t, ndërsa shtoi se i konsideron jashtëtokësorët si “demonë”.
“Nuk kam qenë në gjendje t’i kushtoj ende kohë të mjaftueshme për ta kuptuar vërtetë temën, por do ta bëj, më besoni. Është diçka me të cilën jam i fiksuar”, tha Vance në podcastin e konservatorit Benny Johnson.
Më kanë mbetur edhe tre vjet si zëvendëspresident. Do t’i shkoj deri në fund dosjeve të UFO-ve.
Zëvendëspresidenti po merrej në pyetje në lidhje me deklaratat e bëra nga Donald Trump në shkurt.
Trump, duke përmendur “interes të madh publik”, kishte thënë se donte t’u urdhëronte agjencive federale të identifikonin dhe publikonin dosjet mbi jashtëtokësorët dhe UFO-t, publikimin e të cilave amerikanët e kanë kërkuar për dekada të tëra.
Presidenti po i përgjigjej komenteve të bëra nga paraardhësi i tij, Barack Obama, i cili i ishte përgjigjur një pyetjeje në lidhje me ekzistencën e jashtëtokësorëve: “Ata janë të vërtetë, por unë nuk i kam parë”.
“Nuk e di nëse janë të vërtetë apo jo”, kishte komentuar Trump, duke denoncuar publikimin e informacionit të klasifikuar nga ish-presidenti demokrat.
I ftuar për të komentuar të premten, JD Vance deklaroi: “Nuk mendoj se janë alienë. Mendoj se janë demonë.”
Zëvendëspresidenti, një katolik i devotshëm, shpjegoi se po e përdorte termin në kuptimin e tij të krishterë, duke iu referuar “qenieve qiellore që fluturojnë përreth dhe u bëjnë gjëra të çuditshme njerëzve”.
Nuk ka prova për një origjinë jashtëtokësore për UFO-t, ato fenomene ajrore të paidentifikuara që frymëzojnë magjepsje dhe teori të shumta konspiracioni.
Në vitin 2024, zyra e Pentagonit e specializuar në këto çështje, e quajtur AARO, deklaroi se nuk kishte gjetur asnjë provë empirike për të arritur në përfundimin se disa “fenomene anomale të paidentifikuara” ishin me origjinë jashtëtokësore, ose se qeveria amerikane po i fshihte prova të tilla.
