Leon Panetta, ish-sekretar i mbrojtjes i SHBA-së dhe drejtor i Agjencisë Qendrore të Inteligjencë, e përshkruan Donald Trump si të bllokuar në një “situatë të vështirë” pas tre javësh lufte me Iranin, duke paralajmëruar se veprimet e tij po i dërgojnë botës një mesazh dobësie.
Sipas Panettës, rreziku që Ngushtica e Hormuzit të shndërrohej në pikë krize ka qenë gjithmonë i njohur për ekspertët e sigurisë kombëtare, por duket se administrata ose nuk e ka vlerësuar si duhet, ose ka besuar gabimisht se lufta do të përfundonte shpejt.
Ai tenton të jetë naiv. Por kjo është ajo që bëjnë fëmijët. Nuk është ajo që bëjnë presidentët.
Konflikti nisi me një goditje të fortë që çoi në vrasjen e Ali Khamenei dhe ardhjen në pushtet të Mojtaba Khamenei, por zhvillimet e mëvonshme treguan se avantazhi fillestar nuk ishte i qëndrueshëm.
Lufta u zgjat, numri i viktimave u rrit ndjeshëm dhe presioni ekonomik u përkeqësua, sidomos me rritjen e çmimeve të naftës.
Mbyllja e Ngushticës së Hormuzit, një rrugë jetike për furnizimin global me energji, shkaktoi tronditje në tregjet ndërkombëtare dhe rriti frikën për një krizë më të gjerë ekonomike.
“Nëse do të zhvillosh një luftë me Iranin, kjo mund të krijojë një krizë të madhe nafte”, paralajmëron Panetta, duke shtuar se kjo ishte një pasojë e parashikueshme.
Ai vë në dukje se Trump nuk ka një strategji të qartë daljeje nga konflikti dhe se retorika për “fitore” nuk mjafton pa rezultate konkrete.
“Ai mund të shpallë fitoren sa të dojë, por nëse nuk e arrin armëpushimin, nuk ka asgjë”, shprehet ai, duke theksuar se kontrolli i Ngushticës së Hormuzit nga Irani e bën të vështirë çdo zgjidhje të shpejtë.
Sipas tij, presidenti amerikan përballet me një zgjedhje të vështirë: ose të zgjerojë ndërhyrjen ushtarake për të hapur ngushticën, me rrezikun e humbjeve të reja dhe përshkallëzimit të luftës, ose të tërhiqet duke rrezikuar të perceptohet si i dështuar.
Panetta kritikon edhe mënyrën se si janë menaxhuar marrëdhëniet me aleatët, duke theksuar se mungesa e koordinimit dhe retorika ndaj NATO-s kanë dobësuar mbështetjen ndërkombëtare.
Ai shton se aleancat janë thelbësore në çdo konflikt të madh dhe neglizhimi i tyre e ka lënë SHBA-në më të izoluar në një moment kritik.
Në fund, ai e konsideron situatën si një krizë të vetëshkaktuar, duke nënvizuar se përgjegjësia kryesore bie mbi vetë Trump.
Është një pozicion shumë i vështirë, por askush tjetër nuk është përgjegjës përveç Donald Trump.
