nga Adriatik Lapaj
Edi Rama, Kryeministri pa legjitimitet moral i cili në zgjedhje ka manipuluar vullnetin popullor me metodat e veta të paligjshme, po i merr bashkitë me radhë dhe po u kërkon drejtorëve dorëheqjen.
Që të jemi të qartë, shumica dërrmuese e këtyre drejtuesve jo vetëm që duhet të largohen, por edhe duhet të japin llogari përpara ligjit. Megjithatë, ajo që po ndodh sot është shumë më tepër se sa një pastrim politik, është një grusht shteti institucional.
Po jetojmë në një republikë të një njeriu të vetëm, ku ligji dhe ndarja e pushteteve nuk ekzistojnë më.
Si është e mundur që Kryeministri merr kompetencat e institucioneve të tjera dhe vendos vetë se kush ikën dhe kush qëndron në pushtetin vendor?
Ku janë Kryetarët e Bashkive në këtë mes? Për çfarë janë aty nëse nuk kanë asnjë fjalë për të thënë?
Si mundet që Bashkitë të trajtohen si zyra të Partisë Socialiste?
Kjo nuk është thjesht arrogancë politike, është dhunim i hapur i rendit kushtetues.
A do të heshtë Prokuroria përballë kësaj shkeljeje kaq të qartë të ligjit?
A do të pranojmë që Republika të kthehet përfundimisht në një parti-shtet, ku çdo vendim merret nga një njeri i vetëm?
Nëse kjo nuk ndalet, nesër nuk do të ketë më as bashki, as drejtues vendorë, por vetëm urdhra që zbatohen pa asnjë kundërshtim.
E dinim që ndodhte kështu, por kaq hapur është dhunim total i konceptit të Republikës.
Zgjedhjet e pjeshme dhe ato të ardhshme vendore janë një mjet për të ndalur puçin kryeministror. Mos e votoni më atë që sillet si pronar i vendit e votoni masivisht kandidatët tanë që do të vijnë për të shërbyer e zbatuar ligjin.
