Tre astronautë kinezë u kthyen në Tokë pas gjashtë muajsh në stacionin hapësinor ”Tiangong” (”Pallati qiellor”), duke përfunduar kështu misionin ”Shengzhou-19”.
Anija kozmike që mbante Cai Xuzhe, Song Lingdong dhe Wang Haoze u ul në rajonin verior të Mongolisë së Brendshme, sipas pamjeve nga transmetuesi shtetëror CCTV.
Kina e kishte shtyrë kthimin e ekuipazhit, i cili fillimisht ishte planifikuar për të martën, për shkak të kushteve të këqija të motit në tokë.
Tre astronautët e ”Shenzhou-19” kishin punuar në stacionin hapësinor që nga tetori.
Atje ata kryen eksperimente të shumta, kontribuan në mirëmbajtjen e ”Tiangong” dhe vendosën rekordin për shëtitjen më të gjatë në hapësirë në histori, që zgjati mbi 9 orë.
Një nga tre astronautët në ”Shenzhou-19” është 35-vjeçarja Wang Haoze, një inxhiniere hapësinore e cila u bë gruaja e tretë kineze që arriti në hapësirë, pas Liu Yang në vitin 2012 dhe Wang Yaping në vitin 2013.
Ekuipazhi që punoi për gjashtë muaj në bordin e ”Pallatit qiellor” u drejtua nga Cai Xuzhe, 48 vjeç, një astronaut veteran i cili kishte marrë pjesë tashmë në misionin ”Shenzhou-14”.
I treti është Song Lingdong, një ish-pilot 34-vjeçar i Forcave Ajrore, në fluturimin e tij të parë në hapësirë.
Pekini ka investuar miliarda euro në programin e tij hapësinor për të arritur Shtetet e Bashkuara dhe Rusinë, dhe shpreson të dërgojë një mision me pilot në Hënë deri në vitin 2030 dhe më pas të ndërtojë një bazë hënore.
