Ishte vetëm 5 muajsh kur iu shfaqën problemet në lidhje me shkarkimin urinës nga një valvul në veshkën e majtë dhe që prej asaj kohe anomalitë pasuan njëra-tjetrën deri sot, që ai është 4 vjeç. Trajtimet e para filluan në QSUT, por më pas prindërit vendosën ta dërgojnë në Turqi për ndërhyrje.
“Është paraqitur menjëherë pas lindjes me një anomali të rëndë të traktit urinar. Pas ekzaminimeve u vu re që veshka e majtë ishte pa funksion, por neve na nevojitej që të ruhej kanali i urinës dhe veshka, në mënyrë që t’i shfrytëzonim më tutje për të bërë zmadhimin vezikal, i cili do shërbente në të ardhmen që të funksiononte vetë pa pasur nevojë që të kateterizohej vazhdimisht”, u shpreh Prof. Dritan Alushani, Kirurg infantil, QSUT.
Kirurgu Prof. Dritan Alushani thotë se praktikisht rezultoi se trajtimi atje nuk ishte i përshtatshëm dhe nuk la zgjidhje për zmadhimin e fshikëzës së urinës.
“Atje u trajtua në mënyrë joadekuate, duke qenë se vendosën të hiqnin veshkën dhe gjithashtu edhe kanalin e urinës dhe mbetëm para opsionit që nuk kishim mundësi me çfarë ta zëvendësonim”, u shpreh mjeku.
Ndërhyrja e kryer nga ekipi i profesionistëve të QSUT-së, që mundësoi zmadhimin vezikal të ureterit, mund të konsiderohet ndër më të rrallat edhe në botë.
“Është një operacion që është bërë për herë të parë duke bërë zmadhimin vezikal me ureterin i jep mundësinë që pacienti të urinojë vetë pa praninë e kateterizimit për të gjithë jetën”, tha kirurgu infantil, Alushani.
Sot djaloshi 4-vjeçar ndodhet në një gjendje postoperatore shumë të mirë dhe procesi i urinimit po funksionon normalisht pa qenë nevoja të kateterizohet.
