Mbledhja e djeshme e Asamblesë Kombëtare të PS kaloi të gjitha pritshmëritë. Pritej një analizë e thelluar për zgjedhjet e 14 Majit. Analizë nuk pati. Fundja, PS fitoi 90% të pushtetit vendor dhe është “Ok” me veten, fituesi nuk gjykohet.
Priteshin ndryshime në Qeveri?
Padiskutim.
Sa herë Edi Rama ka kërkuar mbledhjen e Asamblesë, e ka bërë për një qëllim të caktuar e cila i ka shërbyer reformatimit të kabinetit qeveritar, duke “prerë koka” ministrash.
A duhen ndryshime në kabinetin qeveritar?
Patjetër!
Sepse treguesit në vend nuk janë më të mirët, situata ekonomike është e brishtë dhe logjikisht shkarkimi i ministres së Financave, Delina Brahimaj, u pa si moment kthese për krizën që po kalon euro dhe dollari në raport me fuqizimin absurd të lekut, ndërsa nga ana tjetër çmimet në vendin tonë nuk po lëvizin. Rënia e euros favorizon importin dhe po godet ato pak gjëra që eksportohen. Ne jemi një vend që importojmë për konsum në masën 80% dhe eksportojmë vetëm 20%. Imagjinoni çfarë raporti i frikshëm. Kur ne importojmë 80% të nevojave për ekonominë, pse nuk bien çmimet e produkteve të importit?!
Megjithatë, na rezulton se Delina Brahimaj nuk është shkarkuar.
Porosia e Edi Ramës kishte qenë shkrirja e Sekretariatit, duke shkarkuar të gjithë drejtuesit e sekretariateve. Kurrë ndonjëherë Edi Rama nuk është marrë kaq seriozisht me strukturat e brendshme të PS, gjithnjë ishin lënë dytësore. “Tërmet” ishte shkarkimi i Sekretarit të Përgjithshëm të PS, Damian Gjiknuri, ish-ministër dhe drejtues politik në Qarkun e Elbasanit ku në zgjedhjet e 14 majit rezultoi fitues 6:0. “Shkrirja” e sekretariatit në tërësi ndoshta është bërë për të mos u identifikuar largimi i Gjiknurit si “flakje” e tij. Flasim për numrin dy të PS, të mos e harrojmë!!!
Por pse Gjiknuri?
Njësoj si Arben Ahmetaj, edhe Gjiknuri akuzohet i përfshirë në aferën e inceneratorëve. Ndoshta presim zhvillime interesante nga zyrat e SPAK. Këtë nuk mund ta themi me siguri, gjithsesi. Por vendimi i djeshëm i Asamblesë lë hapësirë për dyshim. Problemet me drejtësinë determinojnë qeverisjen dhe PS-në po ashtu në imazhin e saj. Sikurse edhe komentet e analistëve pranë PS të cilët flasin për një ndarje të PS nga problemet e qeverisjes dhe problemet me drejtësinë, na çojnë pikërisht te shkaqet e SPAK-ut. Kështu që, Gjiknuri tashmë është i zhveshur nga funksionet partiake, njësoj si Ahmetaj kur u largua nga drejtues politik në Qarkun e Vlorës dhe më pas e pamë si rrodhën ngjarjet.
Pavarësisht nga “furtuna” mbi sekretariatin e cila për hir të së vërtetës ka qenë një strukturë anonime dhe shumë prej drejtuesve as nuk njiheshin e as nuk dihej se kush drejtonte çfarë, ajo që mund të themi është se zhvillimet surprizuese nuk mund të përjashtohen në vijim. E kjo nuk lidhet as me zgjedhjet e ardhshme Parlamentare të cilat janë (prill-maj 2025) por edhe s’janë larg. Vetëm nëse Edi Rama ka në mendje zgjedhjet e parakohshme.
A po i nënshtrohet PS-ja një “Katarsisi” të dhimbshshëm? Gjuha e trupit e Edi Ramës por edhe mimika si kur hyri ashtu edhe kur doli nga punimet e Asamblesë, tregojnë një situatë jo të qetë brenda socialistëve. Problemet e qeverisjes dhe llogaritë me drejtësinë janë njëra anë, domosdoshmëria për t’i zgjuar strukturat e PS dhe zgjuar ato nga letargjia është ana tjetër.
Por sikleti më i madh nga e gjithë kjo janë emrat e zyrtarëve në dosjet e SPAK. Sot kemi në pranga ish-ministra, deputetë dhe zyrtarë të niveleve të ndryshme të përfshirë në afera korruptive. Një ish-zv/kryeministër është në arrati dhe në kërkim ndërkombëtar. Një tjetër funksionar i “zhveshur” tashmë nga çdo pozicion politik rrezikon t’i drejtohet SPAK-ut fillimisht për të dhënë llogari për disa pyetje, më pas nuk i dihet. Kjo është në vija të përgjithshme situata brenda PS.
Me sa duket, dhimbjet e kokës për Edi Ramën sapo kanë filluar, hesapet me Drejtësinë e re duket se nuk mund të lahen lehtë. Prandaj dhe këto lëvizje të imponuara ishin përpara zgjedhjes për “Katarsis” brenda PS ose Edi Rama, siç thotë populli, të “Puthej me Milon”, zgjatimet e SPAK-ut nuk dihet deri ku do të arrinin…
