Dita e 500 e luftës – Pentagoni njoftoi një paketë të re ndihme ushtarake për Ukrainën me vlerë 800 milionë dollarë, ku ndër të tjera do të përfshihen edhe bomba thërrmuese. Shtëpia e Bardhë mbajti një konferencë shtypi për dërgimin e municioneve thërrmuese në Ukrainë përpara njoftimit të Pentagonit.
Këshilltari i Sigurisë Kombëtare i Shtëpisë së Bardhë, Jake Sullivan, tha se Rusia ka përdorur armë të tilla që nga fillimi i luftës.
“Rusia ka përdorur municione thërrmuese që nga fillimi i kësaj lufte. Ukraina po kërkon bomba thërrmuese për t’u mbrojtur kundër agresionit rus. Në thelb, ne e kuptojmë se armë të tilla janë një rrezik, por kjo vlen edhe nëse rusët marrin më shumë territor, tha ai.
“Ka një ndryshim të madh midis llojit të municioneve thërrmuese të përdorura nga Rusia dhe llojit që SHBA do të dërgonte në Ukrainë. Rusia ka shpërndarë tashmë dhjetëra milionë nga këto armë në territorin ukrainas. “Duhet të pyesim veten – A përbën përdorimi ukrainas i municioneve thërrmuese në të njëjtën zonë një kërcënim shtesë për civilët, duke pasur parasysh se ai territor do të duhet ende të çminohet”, tha ai.
Sullivan shtoi se Presidenti i SHBA Joe Biden miratoi dërgimin e armëve në Ukrainë me rekomandimin unanim të ekipit të tij të sigurisë kombëtare.
“Ishte një vendim i vështirë,” tha Sullivan.
Një bombë thërrmuese është një armë që shpërndahet në ajër dhe lëshon “bomba” të shumta më të vogla në një zonë të gjerë. Ato mund të përdoren në formën e një bombe ajrore, një rakete artilerie ose një rakete lundrimi. Bombat janë projektuar për t’u shpërthyer në përplasje me tokë dhe ka shumë të ngjarë që dikush në zonë të vritet ose të plagoset rëndë.
Ministri ukrainas i Mbrojtjes Oleksy Reznikov përshëndeti vendimin e SHBA për të dërguar municione thërrmuese në vend. Në një postim në Twitter, Reznikov tha: “Armët e reja do të na ndihmojnë në mënyrë të konsiderueshme të de-okupojmë territoret tona, duke shpëtuar jetën e ushtarëve ukrainas”. Ai tha se municioni “nuk do të përdoret në territorin e njohur zyrtarisht të Rusisë”.
Zyrtarët rusë thanë sot se vendimi i SHBA për të dorëzuar bomba thërrmuese në Ukrainë ishte një gjest i “njohjes së dobësisë”, duke shtuar se ai do ta bënte Uashingtonin “bashkëpunëtor” në vrasjen e civilëve.
“Transferimi i municioneve thërrmuese është një gjest dëshpërimi dhe njohjeje e dobësive në kontekstin e dështimit të të ashtuquajturës kundërofensivë ukrainase”, tha Ministria Ruse e Mbrojtjes në një deklaratë.
Diplomacia ruse dënoi “përpjekjen cinike për të zgjatur agoninë e autoriteteve aktuale ukrainase që nuk kujdesen për viktimat civile”, sepse këto bomba thërrmuese vrasin pa dallim.
Këto armë janë të ndaluara në shumë vende, veçanërisht në Evropë, nënshkruese të Konventës së Oslos të vitit 2008. As Shtetet e Bashkuara, as Ukraina, as Rusia nuk janë të përfshira në atë konventë.
