Pas barazimit që mbërriti në ndeshjen e fundit të vitit 2022 ndaj Evertonit, Manchester City po përgatitet për vitin 2023 për ta nisur sërish me këmbën e djathtë. Nga faqja zyrtare e “Qytetarëve” vijnë fjalë kurioze nga Pep Guardiola për disa “teknika” që përdor për të zgjedhur, herë pas here, 11-shen më të mirë titullar.
“Natyrisht ne e dimë se do të jenë 11 lojtarë në fushë në fillim të ndeshjes. Ne nuk mund të vendosim 13”, – filloi Guardiola. “Është e vështirë për mua të zgjedh çdo herë. Në çdo rast, një nga lojtarët më të mirë nuk do të luajë. Kohët e fundit, ndoshta për shkak se po plakem, i kushtoj vëmendje kryesisht gjuhës së trupit, në stërvitje dhe kështu me radhë”.
“Nuk mund të luash mirë kur je i pakënaqur. Ndonjëherë i zgjedh lojtarët bazuar në disponimin e tyre në këtë moment. Ky faktor është një nga më të rëndësishmit në përcaktimin e përbërjes së ekipit, sepse falë tij e di sa të mirë do të jenë kur të dalin në fushë. Herë të tjera gjuha e trupit nuk do të jetë e mirë dhe në këtë kuptim bëhet më komplekse”.
