Lozha e Madhe e Shqipërisë, organizata e vetme masonike e rregullt dhe e njohur në territorin e Republikës së Shqipërisë, njofton se ka ndërruar jetë Nikolla Nosi. Ai ishte anëtar themelues i saj dhe një nga nismëtarët e Masonerisë në Shqipëri.
“Me hidhërim të thellë njoftojmë se Vëllai ynë i nderuar Nikolla Nosi, Sekretari i Madh i Lozhës së Madhe të Shqipërisë, ka kaluar në Orientin e Përjetshëm. Vëlla Nikolla Nosi ishte një nga nismëtarët e Masonerisë në Shqipëri, anëtar themelues i Lozhës së Madhe të Shqipërisë dhe anëtar i Lozhës së Respektuar Arbëria nr.1 në orientin e Tiranës.
Mjeshtër i gradës 33 të Ritit Skocez, ai ka shërbyer me devotshmëri dhe integritet për shumë vite në detyrën e Sekretarit të Madh të LMSH.
Largimi i tij përbën një humbje të madhe për gjithë vëllezërit dhe për Masonerinë Shqiptare. Kujtimi dhe vepra e tij do të mbeten të përjetshme në Tempullin tonë dhe në zemrat tona. I përjetshëm qoftë kujtimi i tij”, thuhet në njoftim.
Lozha e Madhe e Shqipërisë u themelua për të promovuar dhe zhvilluar traditat masonike në vend, duke u bazuar në parimet e universalizmit, vëllazërisë dhe përkushtimit ndaj zhvillimit shpirtëror dhe moral.
