Ish Kryetari i Bashkësisë Islame të Maqedonisë së Veriut, Sulejman Rexhepi ka reaguar ashpër për lajmet e raportuar këtë të premte, se vite më parë kur Ilir Meta ishte President i Republikës, i kishte dhënë 300 mijë euro për një dekoratë që atij i duhej për të rregulluar imazhin.
Sipas raportimeve, Rexhepi kishte dhënë 300 mijë euro në disa këste që të merrte dekoratën nga Presidenti i Shqipërisë, përmes botuesit Fahri Balliu dhe Ferdinand Samarxhiut.
Megjithatë, në reagimin e bërë pasditen e kësaj të premte, fill pas lajmeve të pasqyruara në mediat online në Tiranë, Sulejman Rexhepi thotë se Ilir Meta është burrë shteti e patriot dhe ai nuk ka bërë kurrë akuza të tilla ordinere.”Presidenti Ilir Meta është një burrë shteti, patriot dhe mbrojtës i paepur i interesit kombëtar, mik i imi dhe i familjes time dhe që kurrë, në asnjë rrethanë dhe në asnjë moment, nuk ka lidhje me akuzat politike të fabrikuara kundër tij duke keqpërdorur emrin tim”, shkruan ndër të tjera ai.
Reagim – Sulejman Rexhepi, Kryetar i Bashkësisë Islame të Maqedonisë së Veriut
Shpifjet ordinere të publikuara nga gazeta “Tema” e Mero Bazes dhe portalet e tjera të “Rilindjes” në Shqipëri nuk kanë asnjë lidhje me emrin tim dhe me Presidentin Ilir Meta dhe as nuk janë shkruar nga unë.
Kurrë nuk kam bërë një akuzë kaq ordinere ndaj Presidentit Ilir Meta, përkundrazi u qëndroj të gjitha vlerësimeve publike që kam bërë për të, si një burrë shteti që qëllim të vetëm të angazhimit të tij politik ka patur mbrojtjen e interesit kombëtar dhe çështjes shqiptare.
I përgënjeshtroj me përbuzje shpifjet e fëlliqura të mediave të “Rilindjes” dhe u kërkoj të fshijnë urgjentisht artikujt dashakeq, në të kundërt jam i detyruar të ndjek rrugën më të ashpër ligjore ndaj tyre.
Presidenti Ilir Meta është një burrë shteti, patriot dhe mbrojtës i paepur i interesit kombëtar, mik i imi dhe i familjes time dhe që kurrë, në asnjë rrethanë dhe në asnjë moment, nuk ka lidhje me akuzat politike të fabrikuara kundër tij duke keqpërdorur emrin tim.
